Д.Амангелдиев: Кыргызстан 800 млн суверендүү еврооблигацияларды чыгарды
Калкы 80 миллиондон ашкан жана негизги соода жолдорунда ыңгайлуу географиялык жайгашууга ээ болгон Борбор Азия инвесторлор үчүн абдан жагымдуу аймак болуп саналарын B5+1 бизнес-форумунда Министрлер кабинетинин төрагасынын орун басары Данияр Амангельдиев билдирди.
Анын айтымында, АКШдан келген инвестициялар капитал катары эле эмес, технологиялардын жана башкаруу стандарттарынын булагы катары да өзгөчө мааниге ээ.
Өсүү потенциалы бар багыттардын катарында ал IT тармагын, креативдүү экономиканы, логистиканы жана каржылык кызматтарды атады.
Данияр Амангельдиев Кыргызстанда бизнес-чөйрөнү жакшыртуу боюнча көрүлүп жаткан чаралар тууралуу да маалымдады. Атап айтканда, бизнес үчүн электрондук кызматтарды киргизүү, каттоо жана лицензиялоо жол-жоболорун жөнөкөйлөтүү, инвесторлордун укуктарын коргоо боюнча механизмдерди күчөтүү жана сот системасын модернизациялоо иштери жүргүзүлүп жатат.
Анын сөзүнө караганда, 2025-жылдын жыйынтыгы менен Кыргызстандын экономикасы 11,1%га өскөн. Мындан тышкары, өлкө 800 млн долларга суверендүү еврооблигацияларды жайгаштырып, инвестициялар жөнүндө жаңы мыйзам кабыл алган.
Ошондой эле ал Борбор Азия аймагында Burberry, Mastercard, FedEx, John Deere жана Chevrolet сыяктуу эл аралык ири компаниялар туруктуу негизде иш алып барып жатканын белгиледи.
