Эсептөө палатасында аудиторлор 3кө кыскарат
Жогорку Кеңешке Эсептөө палатасы жөнүндө мыйзамга өзгөртүүлөрдү киргизүү боюнча конституциялык мыйзам долбоору келип түштү. Бул документ Министрлер кабинети тарабынан иштелип чыгып, тышкы аудит органынын көзкарандысыздыгын күчөтүү жана анын ишмердигин INTOSAI эл аралык уюмунун стандарттарына ылайыкташтыруу максатында даярдалган.
Мыйзам долбоору Эсептөө палатанын ыйгарым укуктарын кеңейтүүнү сунуштайт. Мурда ведомство мамлекеттик мүлк менен мамлекет кепилдик берген каражаттардын эффективдүүлүгүн гана текшерсе, өзгөртүүлөрдөн кийин ал финансылык аудитти, нормаларга шайкештик аудитин жана эффективдүүлүк аудитин жүргүзө алат.
Эң негизги жаңылыктардын бири — аудиторлордун санын тогуздан үчкө кыскартуу.
Сунуш боюнча:
- бир аудитор президенттин сунушу менен шайланат,
- калган эки аудитор парламенттин демилгеси менен тандалат.
Төрага аудиторлордун арасынан шайланат.
Ошондой эле квалификациялык талаптар такталган: кандидат жогорку билимге ээ болушу, экономика, финансы же мамлекеттик аудит тармагында кеминде 9 жылдык тажрыйбасы болушу керек. Эсептөө палатада жарандык кызматка өтүү тартиби мамлекеттик кызмат тууралуу мыйзамга ылайыкташтырылат.
Мыйзам долбоору ошондой эле Эсептөө палатанын Кеңешинин курамын жаңыртууну карайт — ага төрага, аудиторлор жана аппарат кызматкерлери кирет. Иштеп чыгуучулардын маалыматы боюнча, аудиторлордун санын кыскартуу бюджеттик 30 млн сомдук чыгымды үнөмдөөгө мүмкүнчүлүк берет.
