Кыргызстан Кытай үчүн инвестициялык жагымдуу өлкөгө айланды
ЕАӨБдүн баяндамасына ылайык, Кытай үчүн Борбор Азияда Кыргызстан инвестициялык жактан барган сайын жагымдуу өлкөгө айланып жатат.
ЕАӨБдүн маалыматы боюнча, 2025-жылдын биринчи жарымында Кытай Евразия аймагында жалпы көлөмү дээрлик 900 млн долларды түзгөн 25 жаңы инвестициялык долбоорду ишке киргизген. Инвестициялык долбоорлордун жалпы саны 2023-жылдагы 171 долбоордон 2025-жылдын ортосуна карата 213кө жеткен.
2025-жылы ишке ашырылган бардык жаңы долбоорлор Борбор Азия өлкөлөрүндө (23 долбоор) жана Азербайжанда (эки долбоор) жайгашкан.
Инвестициялардын негизги бөлүгү Россия менен Казакстанга туура келет — алардын жалпы үлүшү болжол менен 92%ды түзөт. Ошол эле учурда эң жогорку өсүү темптерин Кыргызстан көрсөтүүдө.
"Бул Кытайдын инвестициялык көңүлү Борбор Азия аймагына, анын ичинде Кыргызстанга барган сайын көбөйүп жатканын тастыктайт. Ошондой эле Борбор Азиядагы башка өлкөлөрдүн, айрыкча Кыргызстандын ролу өсүп жатат.
Өлкөдө топтолгон кытайлык түз чет элдик инвестициялардын (ТЧИ) көлөмү 0,8 млрд доллардан 2,1 миллиард долларга чейин көбөйдү. Бул негизинен инфраструктуралык жана логистикалык долбоорлордун ишке киргизилиши менен шартталды", — деп белгилешет баяндаманын авторлору.
