АӨБ Кыргызстан менен табигый кырсыктар учурунда колдонулуучу облигацияларды чыгарууну талкуулады
Бишкек шаарында Мамлекеттик финансылык көзөмөл кызматы менен Азия өнүктүрүү банкынын (АӨБ) өкүлдөрүнүн жумушчу жолугушуусу болуп өттү. Жолугушуу өлкөнү табигый кырсыктардан жана климаттык тобокелдиктерден каржылык жактан коргоонун жаңы инструменттерине арналганын ведомствонун басма сөз кызматы маалымдады.
Жолугушууга кыргыз тараптан Мамлекеттик финансы көзөмөл кызматынын төрагасы Марат Пирназаров баштаган өкүлдөр, ал эми банк тараптан табигый кырсыктарга байланыштуу каржы жана тобокелдиктерди камсыздандыруу боюнча башкы адис Томас Кесслер катышты. Тараптар кырсыктар учурунда жардам көрсөтүү боюнча көп деңгээлдүү программа алкагында өзгөчө кырдаалдарды каржылоо багыты боюнча грант берүү маселесинталкуулашты.
Негизги тема катары табигый кырсыктар болгон учурда колдонулуучу облигацияларды — Development Related Bonds чыгаруу демилгеси каралды. Бул инструмент мамлекеттин каржылык туруктуулугун жогорулатуу жана ири жаратылыш кырсыктары болгондо каражат булактарын алдын ала камсыз кылуу ыкмасы катары бааланууда. Долбоор мындай облигациялар боюнча камсыздандыруу төлөмдөрүн каржылоонужана аларды эл аралык капитал рынокторунда чыгарууга байланышкан чыгымдарды жабууну камтыйт.
Ошондой эле талкуу турак жайларды милдеттүү камсыздандыруу тутумунда камсыздандыруу пулун ишке киргизүү маселесине да арналды. Бул механизм жарандарга төлөмдөрдү кепилдөөгө, камсыздандыруу компанияларынын тобокелдиктерин азайтууга жана калктын камсыздандыруу системасына болгон ишенимин жогорулатууга мүмкүндүк бериши мүмкүн экени белгиленди.
Жолугушуунун жүрүшүндө АӨБдүн консультанттары табигый кырсыктар учурунда тобокелдиктерди жана келтирилген зыянды баалоо үчүн атайын интерфейсти тааныштырышты. Бул инструмент өзгөчө кырдаалдарга жооп кайтарууга байланышкан башкаруучулук жана каржылык чечимдерди кабыл алууда пайдаланылышы мүмкүн.
