Финансы министрлигинде Европа Биримдиги менен кызматташуу маселелери талкууланды
Финансы министринин орун басары Нурбек Акжолов Европа Комиссиясынын Эл аралык өнөктөштүк боюнча Башкы директоратындагы С1 "Борбор Азия жана Афганистан" бөлүмүнүн жетекчиси Шарлотт Адриан айым менен жолугушту. Бул тууралуу Финансы министрлигинен билдиришти.
Жолугушууда Нурбек Акжолов Европа Биримдигинин делегациясынын Кыргызстанга болгон иш сапары эки тараптуу өнөктөштүктү мындан ары өнүктүрүүгө өбөлгө түзөрүн белгиледи. Ошондой эле ал билим берүү, суу чарба жана санариптештирүү тармактарындагы реформаларды колдогондугу үчүн Европа Биримдигине ыраазычылык билдирди.
Иш-чаранын жүрүшүндө кыргыз тарап колдонулуп жаткан программалар боюнча өз милдеттенмелерин ырааттуу аткарып жатканын жана санариптештирүү багытындагы жаңы финансылык макулдашуу боюнча жол-жоболор аяктап жатканын маалымдады.
Өз кезегинде Шарлотт Адриан айым Европа Биримдиги Кыргызстандагы реформалардын жүрүшүн жогору баалай турганын белгилеп, санариптештирүү боюнча жаңы финансылык макулдашууга кол коюуга даяр экенин билдирди. Ал ошондой эле мамлекеттик системаларды модернизациялоого колдоо улантыларын кошумчалады.
Жолугушуунун жыйынтыгында тараптар кызматташтыкты кеңейтүүгө жана биргелешкен долбоорлорду натыйжалуу ишке ашырууга кызыкдар экендиктерин тастыкташты.
