МинКаб органикалык продукция өндүрүүчүлөргө жер бөлүүгө даяр
Министрлер кабинети аймактардагы фермерлерге органикалык продукция өстүрүү үчүн жайыт жерлерден 20–30 сотых өлчөмүндөгү жер тилкелерин бөлүп берүүгө даяр. Мындан тышкары, коштоо жана сертификациялоо иштерине кеткен, баасы 20–30 миң долларга жеткен чыгымдарды да өз мойнуна алууга даяр экенин Министрлер кабинетинин төрагасынын орун басары Бакыт Төрөбаев билдирди.
Анын айтымында, Кыргызстандагы айыл чарба жерлеринин болжол менен 80%ы жеке менчикте болуп, алардын ээлери пайдалануунун ыкмаларын өз алдынча аныкташат. Фермерлерди кооперативдерге бириктирүү боюнча аракеттер жана механизмдер көрүлүп жатканына карабастан, аграрчылар буга ар дайым эле кызыкдар боло бербейт.
Ушуга байланыштуу МинКаб Айыл чарба жерлерин кайра бөлүштүрүү фондунун (ФПС) карамагындагы 270 гектар жайыт жерлерин органикалык продукция өстүрүүгө кызыкдар жеке фермерлерге берүүгө даяр.
Депутат Махабат Мавлянова Кыргызстан органикалык айыл чарбасын экономиканын артыкчылыктуу багыттарынын бири катары аныктаганын жана 2029-жылга чейин органикалык эгин айдалган аянтты 1 миң гектарга жеткирүү максатын койгонун белгиледи. Бирок анын айтымында, бул тармакта алиге чейин чечилбеген маселелер арбын. Ушуга байланыштуу депутат фермерлердин жана тиешелүү адистердин катышуусунда өзүнчө жолугушуу өткөрүүнү сунуштады.
"Кыргызстанда химиялык препараттар баш аламан колдонулуп жатат. Биз балдарыбызга бузулбаган, деградацияга учурабаган жерлерди жана туруктуу айыл чарба өндүрүшүн калтырышыбыз керек. Бизде күрөң көмүр бар, аны жер семирткич катары колдонсо болот. Ноокат районунда химиялык жер семирткичтерди чыгаруучу заводду ишке киргизүү долбоору токтоп турат — аны органикалык багытка кайра ыңгайлаштырууга мүмкүн", — деп эсептейт депутат.
