2025-жылы Туризм фондунда 56,1 млн сом дебитордук карыз кайтарылган
Бишкекте бүгүн Экономика жана коммерция министрлигинде министрликтин коллегиясы болуп, анда "Кыргыз Республикасында туризмди өнүктүрүүнү колдоо фондунун" 2025-жылга карата ишмердүүлүгү талкууланды. Бул тууралуу ведомстводон билдиришти.
Фонддун башкы директору Адилет Джанузаков акыркы жылдары фонд ишмердүүлүгүн башкаруунун жаңы моделине өтүп, каржылык тартипти бекемдөөгө жана ресурстарды натыйжалуу пайдаланууга басым жасалганын билдирди.
Финансылык көзөмөлдүн натыйжасында 56,1 млн сом дебитордук карыз кайтарылып, Нарын шаарындагы жана Тосор айылындагы долбоорлор боюнча зайымдар жабылган. IT, байланыш жана коштоочу кызматтар боюнча чыгымдар оптималдаштырылып, туруктуу башкаруу механизми түзүлгөн.
Консолидацияланган каражаттар туристтик инфраструктураны өнүктүрүүгө багытталып, Rest Point тармагынын 18 объектисинин 11и иштеп жатат. Ош облусунда үч жаңы туристтик объектти куруу үчүн Дүйнөлүк банктан 4,5 млн доллардан ашык грант тартылган. Мындан тышкары, Тамга–Тосор, Baytik Mountain Resort жана Chatkal Mountain Resort долбоорлору боюнча инвестициялык иштер уланууда.
