Экономика министрлигинин коллегиясында 2026-жылга пландар талкууланды
Бугүн Экономика жана коммерция министрлигинде Министрлер Кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Бакыт Төрөбаевдин катышуусунда министрликтин коллегиясынын жыйыны болуп өттү. Бул тууралуу Экономика министрлигинен билдиришти.
Жыйында министрдин биринчи орун басары Чоро Сейитов 2030-жылга чейинки Улуттук өнүгүү программасын ишке ашыруу жана министрликтин 2026-жылга карата иш планы боюнча баяндама жасады. Анын айтымында, 2025-жылы ИДПнын көлөмү 1 976,4 млрд сомду түзүп, реалдуу өсүү темпи 111,1%га жеткен.
Баяндаманын алкагында индустриялаштыруу, экспортту өнүктүрүү, регионалдык хабды калыптандыруу жана туризм тармагын өнүктүрүү боюнча негизги багыттар белгиленди. Атап айтканда, өнөр жай фондун түзүү, экспортко багытталган ишканаларды колдоо, инвестиция тартуу жана туристтик инфраструктураны жакшыртуу чаралары каралды.
Жыйынтыгында Бакыт Төрөбаев өлкөнүн өнөр жай потенциалын натыйжалуу пайдалануу, өнөр жай объектилерине ревизия жүргүзүү жана мамлекеттик колдоого муктаж ишканаларды аныктоо зарылдыгын белгиледи. Ошондой эле эл аралык стандарттарга жооп берген дата-борборлорду түзүү маселесин кароону сунуштады.
Экономика жана коммерция министри Бакыт Сыдыков бардык сунуштар мындан аркы иштерде эске алынып, ишке ашырыларын билдирди.
