2026-жылы иррегация объектилерин калыбына келтирүүгө бюджеттен 12 млрд 300 млн сом бөлүндү
2026-жылга карата иррегация объектилерин калыбына келтирүү жана оңдоо иштери үчүн мамлекеттик бюджеттен 12 млрд 300 млн сом каралды. Бул тууралуу Министрлер кабинетинин төрагасынын орун басары - суу ресурстары, айыл чарба жана кайра иштетүү өнөр жайы министр Бакыт Төрөбаев бүгүн Жогорку Кеңештин отурумунда билдирди.
Анын айтымында, бул каражат каналдарды оңдоо, тазалоо жана бетондоо, каналдарга бетон полотносун төшөө, гидротехникалык курулмаларды, насостук станцияларды оңдоо-калыбына келдирүү жана башка ушул сыяктуу иштерге жумшалат.
“Иррегация багытында бүгүнкү күндө 498 суу сактагыч бар. Аларда азыр топтолгон суунун көлөмү 939 млн м³ түзүп, бул көрсөткүч былтыркы караганда - 32 % аздык кылат. 2026-жылы 1 млн 250 миң гектар айдоо жерине себүү иштери пландап жатабыз. Анын 885 миң гектарын ээлеген сугат аянтын орточо 4-5 ирет сугаруу үчүн 6 млрд 3 млн м³ суу пландалды”- дейт Төрөбаев.
Төрөбаевдин айтымында, жазгы талаа жумуштарынын ичинде - сугат суу менен камсыздоо; сапаттуу жана жаңы үрөөндөрдү даярдоо; техника каржаттарын оңдоо; жер семирткич жана күйүүчү майлоочу майларды жеткирүү сыяктуу иш чаралар бар. Мындан сырткары тажрыйба алмашуу, жаңы агротехникалык ыкмаларга адистерди үйрөтүү, аны колдонуу боюнча ишчараларды жүргүзүү, дыйкындардын эмне сээп, кайда сатаары тууралуу саясатты алып баруу иштери да каралган.
Жалпысынан республика боюнча 139 объектиде курулуш жана долбоорлоо иштери жүргүзүлүшү күтүлөт.
