Бишкектеги кафелердин бири кирешесин жашырып жүргөнүн Салык кызматы аныктады
Мамлекеттик салык кызматы Бишкек шаарындагы фискалдык программалык камсыздоо (ФПК) — сатуу жөнүндө маалыматтарды салык органдарына өткөрүп берүүчү система менен иштеген кафелерге текшерүү иштерин жүргүздү. Анын жүрүшүндө «Кульджа ХОГО» кафе тармагындагы олуттуу мыйзам бузуулар аныкталды. Бул тууралуу Мамлекеттик салык кызматынан кабарлашты.
Билдирүүгө караганда, бир менчик ээсине таандык үч мекемеде «көмүскө» эсеп жүргүзүү үчүн каттоодон өтпөгөн программалар колдонулган. Бул сатылуулардын бир бөлүгү расмий фискалдык системада чагылдырылбаганын билдирет. Ошондой эле, төлөмдөр компаниянын атына эмес, жеке жактарга катталган QR-коддор аркылуу кабыл алынгандыгы аныкталган. Мындан тышкары, кассалардан фискалдык чектер менен ырасталбаган накталай акча каражаттары табылган.
Алдын ала маалыматтар боюнча, ФПКга кошулган учурдан тартып эсепке алынбаган кирешенин суммасы болжол менен 12 млн сомду түзгөн. Төлөнбөгөн салыктардын божомолдуу суммасы — болжол менен 648 миң сом.
Эске салсак, кош эсеп жүргүзүү жана кирешелерди жашыруу мыйзам бузуу болуп саналат.
Мыйзам бузуу белгилери аныкталган учурда мындай аракеттер үчүн айып пулдан тартып, жазык жоопкерчилигине чейин жоопкерчилик чаралары каралган. Учурда Салык кызматы текшерүү иш-чараларын улантууда.
