Россиядагы мигранттар кирешесин көрсөтүп, салык төлөй башташат
Өкмөттүк мыйзам долбоорлору боюнча комиссия "Россия Федерациясында чет өлкөлүк жарандардын укуктук абалы жөнүндө" мыйзамга жана Салык кодексине өзгөртүүлөрдү жактырганын ЖМКлар кабарлады.
Өзгөртүүлөр мигранттардын кирешелерине көзөмөлдү күчөтүүнү, кошумча салык милдеттенмелерин киргизүүнү жана эрежелер бузулган учурда Россияда болуу мөөнөтүн кыскартууну карайт.
Документке ылайык, Россияда убактылуу жашаган чет өлкөлүктөр Ички иштер министрлигине (ИИМ) өздөрүнүн мыйзамдуу кирешелери тууралуу маалымат берүүгө милдеттүү болот. Бул үчүн эмгек акы тууралуу маалымкаттар, салык декларацияларынын көчүрмөлөрү же салыктар төлөнгөнүн тастыктаган документтер жарайт. Эгер киреше тастыкталбаса, убактылуу болуу мөөнөтү кыскартылышы мүмкүн. Бул талап мигранттардын үй-бүлө мүчөлөрүнө да тиешелүү болот.
Мындан тышкары, кирешенин минималдуу деңгээли өзүнчө белгиленет: эгер киреше аймактагы жашоо минимумунан төмөн болсо, иштөөгө патент алуу же аны узартуу мүмкүн болбойт. Өзгөчөлүк катары патентти биринчи жолу алгандарга жана жеке адамдарда алардын жеке муктаждыктары үчүн иштегендерге жеңилдик каралган.
Ошондой эле жаңы милдеттенме — жеке киреше салыгын алдын ала төлөө киргизилет. Жеке адамдарда иштеген эмгек мигранттары үчүн төлөмдүн өлчөмү карамагында турган ар бир жашы жете элек бала үчүн 50%га көбөйтүлөт.
"Уюмдарда жана жеке ишкерлерде иштеген кызматкерлер үчүн базалык ставка айына 1,2 миң рубль болот; ал эми жеке муктаждыктар үчүн жалданган кызматкерлер үчүн — 1,7 миң рубль", — деп түшүндүрдү Россия юристтер ассоциациясынын башкармалыгынын төрагасы Владимир Груздев.
