Кыргызстанда Мамлекеттик алименттик фонд түзүү демилгеси көтөрүлдү
Кыргызстанда Мамлекеттик алименттик фонд түзүү демилгесин "Консалтинг жана укук" коомдук фондунун директору Айжан Жуманалиева билдирди.
Анын айтымында, фонддун негизги максаты — баланы багууга каралган ай сайынкы төлөмдү өз убагында төлөп берүүнү мамлекетке алуу. Мамлекеттен төлөнгөн каражаттар мамлекеттик органдар аркылуу алимент төлөбөгөн адамдардан өндүрүлөт.
Башкы принцип — каражаттын кайтарымдуулугу. Эксперттердин пикиринде, мындай чара алимент төлөбөгөндөрдү тартипке салууга жардам берет.
Белгиленгендей, мындай тажрыйба Францияда жана Өзбекстанда бар. Мындан тышкары, бул сунуш акыркы жылдары Россияда да талкууланып келет. "Бул абдан жакшы механизм, бирок аны ишке ашыруу үчүн тиешелүү каржылоо талап кылынат", — деди Айжан Жуманалиева.
Мындан тышкары, ижарадагы батирде жашаган балдар үчүн "турак жай алиментин" киргизүү сунушталууда.
Адвокаттын айтымында, ажырашуудан кийин балдардын көбү энелеринин колунда калат жана көпчүлүгү батир ижарага алууга мажбур. Бишкек шаарында бир бөлмөлүү батирдин ижара акысы кеминде 40 миң сомду түзөт.
Буга чейин маалымдалгандай, 2025-жылы Кыргызстанда алименттик милдеттенмелер боюнча 60,7 миң аткаруу өндүрүшү каттоодо турган.
