УИА менен Дүйнөлүк банк инвестициялык жөнгө салууну талкуулады
Улуттук инвестициялар агенттигинин башчысы Равшанбек Сабиров Дүйнөлүк банк өкүлү Хью Ридделл менен Кыргызстандагы инвестициялык жөнгө салууну реформалоо маселесин талкуулады.
Мекеменин басма сөз кызматы билдиргендей, тараптар кызматташуунун артыкчылыктуу багыттарын, инвестиция тармагында заманбап ченемдик-укуктук базаны түзүү маселесин, ошондой эле инвесторлордун укуктарын коргоо механизмдерин карашты. Мындан тышкары, жөнгө салуунун туруктуулугун жана алдын ала болжолдуулугун жогорулатуу, инвестициялык климатты өнүктүрүүнүн эл аралык тажрыйбаларын киргизүү, инвестицияларды мамлекеттик колдоо инструменттерин — анын ичинде стабилизациялык жана стимулдаштыруучу чараларды өнүктүрүү маселелери талкууланды.
Жолугушууда инвесторлордун мамлекеттик органдар менен өз ара аракеттенүү жол-жоболорун оптималдаштыруу, административдик тоскоолдуктарды кыскартуу, ошондой эле мыйзам алдындагы ченемдик актыларды мамлекеттик инвестициялык саясаттын максаттарына жана эл аралык стандарттарга, анын ичинде Дүйнөлүк банктын сунуштарына шайкеш келтирүү маселелери да көтөрүлдү.
Равшанбек Сабиров инвестициялык мыйзамдарды реформалоодо Дүйнөлүк банк тарабынан көрсөтүлүп жаткан эксперттик жана консультациялык колдоонун маанилүүлүгүн белгиледи.
