БШК мэрияны ишкерлерди кыспоого чакырды
Муниципалдык жерди ижарага берүү акысын жана борбор калаадагы муниципалдык базарлардагы ижара төлөмдөрүн жогорулатуу маселеси Бишкек шаардык кеңешинин муниципалдык менчик, жер маселелери, шаар куруу жана архитектура боюнча туруктуу комиссиясынын жыйынында көтөрүлдү.
Казыбек Эргешов ишкерлер шаардык бюджетти түзүүнүн негизги катышуучулары экенин, алар жумуш орундарын түзүп, жумушсуздук менен жакырчылыктын деңгээлин төмөндөтүүгө салым кошорун эске салды.
"Чакан жана орто бизнести колдоп, ишкерлерге өнүгүү үчүн шарт түзүүнүн ордуна, мэрия жер ижара акысын жогорулатуу аркылуу шаардык бюджетти алардын эсебинен толтурууга аракет кылууда", — деди ал.
Шаардык жол-транспорт инфраструктурасы муниципалдык ишканасынын директорунун орун басары Съездбек Сарыбаев ишкананын балансында 7 муниципалдык базар бар экенин жана алар менен келишимдин негизинде иш жүргүзүлөрүн түшүндүрдү.
Анын айтымында, азыркы тарифтер мурдагы ээлер тарабынан белгиленген жана бүгүнкү күндө базарларды кармоо чыгымдарын жаппай жатат. Ошондуктан чарчы метрине 23 сомго жогорулатуу чечими кабыл алынган.
"Бул каражаттар бюджетке түшөт. Бир контейнер үчүн орточо эсеп менен 3 миң сомдун тегерегинде төлөшөт. Инфляцияны жана кызмат көрсөтүүлөрдүн баасынын өсүшүн эске алуу менен, биз рентабелдүүлүктү камсыздап, чыгымдарыбызды жабышыбыз керек", — деди ал.
Депутат бул жүйөлөргө макул болбой, ижара акысынан тышкары ишкерлер күзөт жана тейлөө үчүн кошумча чыгымдарды да көтөрөрүн белгиледи. Жалпысынан алардын чыгымы бир контейнер үчүн 10 миң сомго чейин жетерин айтты.
"Силер ишкерлерге каршы эмес, аларга колдоо көрсөтүшүңөр керек. Суу ичкен кудугуңа түкүрбө", — деп кайрылды депутат.
