Мамлекеттик салык кызматы ЭСФнын жаңы формасын киргизди

Мамлекеттик салык кызматы электрондук соода аянтчалары аркылуу соода жүргүзүүдө колдонулуучу электрондук эсеп-фактуранын жаңы формасын киргизди.

Бул формадагы ЭСФ товарларды Кыргызсстан аймагынан сыртка чыгаруунун алдында таризделет жана электрондук соода аянтчасы аркылуу кийинки сатуу үчүн багытталган экспорттук товарларды документтик коштоо максатында гана колдонулат.

Мындай эсеп-фактураны тариздөө товарды сатуу катары эсептелбейт жана салык милдеттенмелеринин пайда болушуна алып келбейт.

Электрондук соода аянтчасы үчүн ЭСФ кантип таризделет:

– Электрондук эсеп-фактуралардын маалыматтык системасына кирип, "Маркетплейстер үчүн ЭСФ" бөлүмүн тандаңыз;
– экрандын оң жогорку бурчундагы "Кошуу" баскычын басыңыз;
– андан соң салык төлөөчү белгиленген тартипке ылайык бардык талааларды "Электрондук соода аянтчасында соода жүргүзүүнүн алкагында эсеп-фактураны тариздөө жана колдонуу тартибине" ылайык толтурушу керек.

Белгилей кетүүчү жагдай: электрондук соода аянтчасынын алкагында таризделген эсеп-фактурага оңдоо киргизүүгө болбойт жана ал жараксыз деп табылбайт.

Салык төлөөчү бардык маалыматтарды толук, так жана катасыз киргизүүгө милдеттүү, анткени киргизилген маалыматтар кийин жокко чыгарылбайт жана өзгөртүлбөйт.

Жаңы форма бизнести колдоо жана товарларды Кыргызстан аймагынан үзгүлтүксүз экспорттоого шарт түзүү максатында киргизилген.