"Жыргалаң" курортунда дагы төрт аркан жолун курулат
Ала-Тоо Резорт менен Doppelmayr компаниясы "Жыргалаң" курортунда дагы төрт аркан жолун куруу боюнча келишимге кол коюшту. Документке компаниянын Россия жана КМШ өлкөлөрү боюнча бөлүмүнүн жетекчиси Валерий Яшин жана "Ала-Тоо Резорт" ААКсынын башкармалыгынын төрагасы Жаркынбек Максутов кол койду.
Жаңы келишим Жыргалаң айылындагы заманбап тоо-лыжа кластерин түзүү боюнча ири долбоордун уландысы болуп саналат. 2025-жылы түзүлгөн алгачкы келишимдин алкагында эки негизги аркан жолу курулуп жатат. Аларды пайдаланууга берүү 2026-жылдын май айына пландалган.
Бүгүн кол коюлган документке ылайык, 2026-жылдын аягына чейин Жыргалаңда дагы төрт аркан жолу орнотулат. Натыйжада декабрь айына карата линиялардын жалпы узундугу 8 чакырымдан ашып, лыжа трассаларынын узундугу 46 чакырымга жетет.
Курортту өнүктүрүүнүн биринчи фазасы
Валерий Яшин белгилегендей, 2025-жылдан тарта адистер инфраструктуралык объектилерди куруу менен катар Жыргалаңдын комплекстүү өнүгүүсүнүн мастер-планын иштеп чыгышкан.
Биринчи фазада аркан жолдордон тышкары кошумча инфраструктура да каралган. 2026-жылы тоодо толук кандуу кызмат көрсөтүү комплексин түзүү боюнча масштабдуу иштер жүргүзүлөт. Максат — декабрь айына чейин туристтерге дүйнөлүк алдыңкы багыттарга тең келе турган тейлөө деңгээлин камсыз кылуу.
Заманбап технологиялар жана эл аралык тажрыйба
Компания өкүлдөрүнүн айтымында, курортко орнотулуп жаткан жабдуулар тармактагы эң заманбап чечимдердин катарына кирет.
Doppelmayr компаниясынын долбоорлорунун болжол менен 60%ы бийик тоолуу аймактарда ишке ашырылат. Компания дүйнөнүн 96 өлкөсүндө иш алып барат жана мындай масштабдагы объект Кыргызстандагы алгачкы долбоору болуп саналат.
