Кара-Балтадагы мунай иштетүүчү заводу модернизацияланат
Инвесторлор менен иш жүргүзүү алкагында Инвестиция боюнча улуттук агенттигинин кызматкерлери, Экономика министрлигинин өкүлдөрү жана Кара-Балта мэриясы "Чайна Петроль Компани "Джунда" ЖЧКсынын мунай кайра иштетүүчү заводуна барып, модернизациянын жүрүшү менен таанышты.
Иш сапар компания жана инвестор — Кытайдын Шэньсий көмүр-курулуш корпорациясы тарабынан расмий чакыруунун негизинде уюштурулган. Алар долбоордун капиталдык ремонт жана модернизация иштеринин жүрүшү менен таанышты.
Жылына 800 миң тонна кубаттуулуктагы мунайду кайра иштетүүчү заводдун модернизациясы Кыргызстандагы эң ири инвестициялык долбоорлордун бири болуп саналат. Долбоор аталган агенттик менен "Орто Азиялык энергетикалык компания" ЖЧКсынын ортосундагы инвестициялык макулдашуу алкагында ишке ашырылууда. Кошумча макулдашууга ылайык, инвестициялар көлөмү 193,75 млн долларга чейин көбөйтүлүп, долбоор 31-июлга чейин бүткөрүлүшү пландалууда.
Сапар учурунда катышуучулар курулуш-монтаж иштеринин учурдагы баскычын жана өндүрүштүк объекттердин даярдык деңгээлин көрүштү.
