Айып пулдарды төлөбөгөндөргө сыртка чыгууга чектөө киргизилет
Сот аткаруу департаменти айып пул, алимент төлөбөгөнү үчүн сот чечими менен Кыргызстандан тышка чыгуусуна уруксат берилбеген жарандарга чет өлкөлөргө чыгуусуна тыюу салынарын билдирди.
Жарандардын өлкөдөн чыгуу укугун убактылуу чектөө бир нече себептер менен коюлушу мүмкүн, ар бир чектөөнүн мазмуну жана аны алып салуу тартиби ар түрдүү.
Мамлекеттик органдар салган айып пулдар мөөнөтүндө төлөнбөсө сот аткаруучу карызкордун өлкөдөн чыгуусун убактылуу чектейт. Бул чектөөнү алып салуу үчүн карызкор жаран аны толук өлчөмүндө төлөөсү тийиш. Төлөмдү мобилдик тиркеме аркылуу 24 саат ичинде төлөөгө болот, карыз толук төлөнгөн соң маалымат автоматтык түрдө жаңыртылып, чектөө алынат.
Алимент, салык, насыя акча жана башка акчалай карызы үчүн соттун чечими менен өлкөдөн чыгышына чектөө коюлат. Бул чектөөлөр карызкор жаран талаптарды толук аткарып, бардык карызын төлөгөндө, өндүрүүчүнүн жазуу түрүндөгү арызынын негизинде, аткаруу өндүрүшү мыйзамда белгиленген тартипте токтотулганда же аяктаганда сот аткаруучунун чечими менен алынат.
Ал эми кандайдыр бир кылмыш ишинин алкагында өлкөдөн сыртка чыгуусу чектелген жарандар үчүн сот аткаруу кызматы жооп бербейт. Чектөөнү алып салуу маселесин аны койгон тиешелүү орган же сот гана чечет.
Сот аткаруу кызматы жарандар карызы бар же жогун тактоо үчүн күнү-түнү иштеген 0503 39 40 44 телефонуна кайрылып же https://suddep.sot.kg/page/debtor сайты аркылуу билсе болорун маалымдады.
