Кумтөрдөгү тоо-кен казуу шарттары татаалдашып, алтындын наркына таасир этти
Бүгүн «Кумтөр Голд Компани» 2025-жылы өндүрүлгөн алтындын көлөмү, анын өздүк наркы жана компаниянын өндүрүштүк-каржылык ишмердүүлүгүнүн башка аспектилери боюнча маалымат таратты.
Билдирүүгө караганда, Кумтөрдөгү тоо-кен казып алуунун шарттары оорлошуп, алтынды ылгап алуу да татаалдашып, алтындын өздүк наркына таасир этти. 2025-жылы бардык чыгымдарды, салыктарды жана башка төлөмдөрдү эсепке алганда, бир унция алтындын өздүк наркы 1 884 $ түздү.
Ошондой эле өздүк нарктын өсүшүнө дүйнөдөгү акыркы геосаясий окуялардан улам, логистиканын, күйүүчү майдын, реагенттердин, тетиктердин, электр энегриясынын, ж.б. кескин кымбатташы себеп болду.
Мисалы: күйүүчү майлар - 50%, реагенттер жана химикаттар - 70%, оор тоо кен жана көмөкчү техникалардын тетиктеринин баасы 30% чейин кымбаттады. Ошондой эле логистика кыйындап, мурда үч аптада келчү товарлар үч айда жетип, транспорттук чыгымдар 106% же эки эсе өскөн, электрэнергия 92% кымбаттаган.
«Кумтөр Голд Компани» ЖАК тарабынан 2025-жылы 12 081 кг же 388 418 унция алтын өндүрүлгөн. 2025-жылы бир унция алтындын баасы 2882,7 $ башталып, жыл аягында 4 612,95 $ жеткен жана орточо баасы 3 711 $ түздү.
Алтын өндүрүүдөн түшкөн жалпы киреше өткөн жылы 1 млрд 434,6 миллион $ жетип, таза киреше 706 миллион $ ашкан, ал эми салык жана башка төлөм түрүндө мамлекеттин бюджетине 246 млн 507 миң $ которулган.
