Таш-Көмүрдө 150 орундуу оорукана жана спорт комплекси курулууда
Мамлекет башчысы Садыр Жапаров 23-октябрда Жалал-Абад облусуна болгон иш сапарынын жүрүшүндө Таш-Көмүр шаарынын 2021-2026-жылдардагы социалдык-экономикалык өнүгүүсүнүн жыйынтыктары, ишке ашырылган долбоорлор жана мындан аркы өнүгүү пландары менен таанышты. Бул тууралуу президенттин администрациясы кабарлады.
Маалыматка ылайык, шаарда 150 орундуу борбордук оорукананын, спорт комплексинин жана эс алуу паркынын курулушу уланууда.
2021–2026-жылдары 3 975 орунга ылайыкталган "Шахтёр" борбордук стадиону реконструкцияланган.
Ошондой эле шаардын түндүк бөлүгүндө бокс залы, балдардын искусство мектебинин жаңы имараты жана А. Пушкин атындагы № 9 мектептин спорт залы пайдаланууга берилген. Шаардык шаар куруу жана архитектура башкармалыгынын имараты да оңдолгон.
Мындан тышкары, президенттин Турукташтыруу фондунун каражаттарынын эсебинен шаардын ички жолдорун асфальттоого, социалдык объектилерди курууга жана инфраструктураны жакшыртууга каражат бөлүнгөн.
Коммуналдык кызматтар үчүн 11 атайын техника сатып алынып, жол инфраструктурасын жакшыртуу иштери жүргүзүлүүдө.
