Кыргызстан менен GIZ "жашыл экономика" боюнча кызматташат
Эмгек, социалдык камсыздоо жана миграция министрлиги менен Германиянын эл аралык кызматташтык коому (GIZ) ортосунда "Борбор Азиядагы "жашыл" экономика үчүн "жашыл көндүмдөр" аттуу аймактык долбоорду ишке ашыруу боюнча макулдашууга кол коюлду.
Ведомстводон маалымдашкандай, макулдашууга эмгек министри Канат Сагынбаев жана GIZ уюмунун аймактык долбоорунун жетекчиси Удо Фолькерс кол койду.
Долбоор күн технологиялары, энергияны үнөмдөө, суу ресурстарын сарамжалдуу пайдалануу жана калдыктарды башкаруу боюнча адистерди окутууну, билим берүү программаларын жаңыртуу жана окутуунун жаңы формаларын киргизүүнү, жаштардын жана чоңдордун эмгек рыногунун заманбап талаптарына ылайык жумушка орношуу мүмкүнчүлүктөрүн кеңейтүүнү карайт.
Регионалдык долбоор Борбор Азия өлкөлөрүндө экологиялык багыттагы экономиканы өнүктүрүүгө жана кадрларды даярдоодо тажрыйба алмашууга багытталган.
