Кыргызстанда 1100 ветеринар жетишпейт - Абай Казаков
Кыргызстанда болжол менен 2300 ветеринар керек, бирок учурда болгону 1200 адис гана иштеп жатат. Бул тууралуу радио эфиринде Айыл чарба министрлигине караштуу Ветеринария, мал чарбасын өнүктүрүү, жайыт жана тоют кызматынын эпизоотияга каршы көзөмөл башкармалыгынын башчысы Абай Казаков билдирди.
Анын айтымында, административдик-аймактык реформадан кийин айыл өкмөттөрүнүн саны 400дөн 235ке чейин кыскарган.
Алардын ичинен 192си ветеринарларды кабыл алган, ал эми калгандары адистерсиз калууда.
Ал белгилегендей, ветеринардык айрым ыйгарым укуктар, анын ичинде эмдөө иштери жеке ветеринарларга жүктөлгөн.
Учурда жеке ветеринарлар мамлекеттик же муниципалдык бюджеттен каржыланбайт. Алардын кирешеси калктын кызмат үчүн төлөгөн каражаттарынын эсебинен түзүлөт.
