Инвестициялар боюнча улуттук агенттиги ири компаниялар менен кызматташат
Инвестициялар боюнча улуттук агенттиктин башчысы кечээ Бишкек шаарындагы “Кока-Кола Бишкек Боттлерс” ЖЧКсынын заводунда болгонун аталган агенттиктен билдиришти.
Маалыматта белгиленгендей, анда ишкананын иши, ошондой эле өлкө экономикасына инвестицияларды кеңейтүү жана мындан аркы өнүгүү келечеги талкууланды.
Компаниянын өкүлдөрүнүн айтымында, ишкана Кыргызстанда 1996-жылдан бери ийгиликтүү иш алып барып келет жана бул аралыкта өндүрүштү өнүктүрүү, жумуш орундарын түзүү жана мамлекеттик бюджетке салык түшүүлөрдү көбөйтүүгө 113 млн доллардан ашык инвестиция салган.
2026-жылы компания заводдун ишке киргизилгенинин 30 жылдыгын белгилейт.
Жолугушууда компаниянын өндүрүштүк кубаттуулуктарын кеңейтүү боюнча пландарына өзгөчө көңүл бурулду. Бул пландар жабдууларды модернизациялоо жана өндүрүштүк инфраструктураны өнүктүрүүнү камтыйт.
Улуттук агенттик компаниянын инвестициялык пландарын ишке ашырууну колдоо максатында колдонуудагы механизмдердин алкагында преференцияларды алуу маселелери боюнча көмөк көрсөтөт.
