Кыргызстанда трансферттердин тартиби өзгөртүлөт: акча кыйын аймактарга багытталат
Министрлер кабинети республиканын бюджетинен жергиликтүү бюджеттерге берилүүчү максаттуу трансферттердин тартибин өзгөрттү.
Документ 2025–2030-жылдарга региондорду өнүктүрүү программаларына ылайык келтирилип, өзгөчө шарттагы аймактарды колдоону күчөтүүгө багытталган.
Өзгөртүүлөргө ылайык, каражаттарды бөлүүдө артыкчылык:
- шаарларды өнүктүрүүгө;
- өсүш борборлоруна;
- тоо аймактарына, жетүү кыйын аймактарга;
- чек ара райондоруна берилет.
Трансферт бөлүү жөнүндө чечим Министрлер кабинети республиканын бюджеттик мүмкүнчүлүктөрүн жана жергиликтүү өз алдынча башкаруу органдарынын өтүнүчтөрүн эске алуу менен кабыл алат. Каражаттар аймактардын бекитилген социалдык-экономикалык өнүгүү программаларын жүзөгө ашырууга багытталат.
Мындан тышкары, каражаттарды бөлүүдө формулировкалар жана ыкмалар жаңыртылып, жергиликтүү бюджеттердин тең салмактуулугун камсыз кылуу механизми киргизилген.
Өкмөттүн эсептөөсүндө, бул өзгөртүүлөр бюджеттик ресурстарды региондорду өнүктүрүүгө жана аймактар арасындагы дисбалансты азайтууга эффективдүү пайдаланууга мүмкүндүк берет.
Токтом расмий жарыяланган күндөн тартып 10 күндөн кийин күчүнө кирет.
