Курулуш тармагынан эки айда 4 млрд 491 млн сом салык жыйналды
2026-жылдын январь-февраль айларында курулуш тармагынан мамлекеттик бюджетке 4 млрд 491 млн сом салык түшкөнүн Мамлекеттик салык кызматынын төрагасы Алмамбет Шыкмаматов билдирди. Бул маалымат курулуш компанияларынын өкүлдөрү менен өткөн жолугушууда айтылды.
Жыйындын жүрүшүндө Шыкмаматов тармактын акыркы жылдардагы көрсөткүчтөрүнө токтолуп, бюджеттик түшүүлөр туруктуу өсүп жатканын белгиледи. Анын айтымында, 2020-жылы курулуш тармагынан 1 млрд 876 млн сом түшсө, кийинки жылдары бул көрсөткүч кыйла жогорулап, 2025-жылы 17 млрд 764 млн сомго жеткен.
Ошондой эле ал курулуш компаниялары менен кызматташууну күчөтүү зарылдыгын айтып, салык режимин жеңилдетүү боюнча сунуштарды биргелешип иштеп чыгууга даяр экенин билдирди.
Жолугушууга Бишкек шаары, Чүй жана Ош облустарынан келген курулуш тармагынын өкүлдөрү катышты.
