Түндүк-Түштүк жолуна делген 1 млрд доллардын жарымы сол чөнтөккө кеткен - С.Жапаров
Түндүк-Түштүк унаа жолуна алынган 1 млрд доллардын жарымы сол чөнтөккө кеткенин президент Садыр Жапаров журналист Ыдырыс Исаковго берген маегинде билдирди.
Садыр Жапаров белгилегендей, 1 млрд доллар акча менен мындай жолдон экини салып коюуга мүмкүн эле.
“Бул долбоор боюнча чын-чынына келгенде баягы таш кулай турган, көпүрөлөрдүн туура эмес жерлери, тоонун түптөрүнө салып койгон, кум-шагыл куюла турган, кыштын күнү кар-көчкү түшө турган жерлерин таптакыр караган эмес экен. Биз акыркы 3-4 жылдан бери изилдеп отуруп, былтыр ишке киришкенбиз. Курулуш министрлиги дагы бир 5-6 тилкени алган, ошондуктан жаңы туннелдин ары-бери жагында көп иштер бар экен. Үлгүрсөк жол 2027-жылдын күз мезгилине чейин, болбосо 2028-жылы толук ачылат. Жайы-кышы дебей ачсак болот. Мурдагылардын кемчилиги болсо да, биз моюнубузга алып, аягына чыгаралы деп жатабыз”, -деди президент.
Ошондой эле мамлекет башчысы кемчиликтерди оңдоо үчүн бюджеттен кошумча каражат бөлүнүп жатканын кошумчалады.
“Бирок, ал үчүн дагы бюджеттен 100 млн доллар чыгым боло турган болуп жатабыз. Бул долбоорго 1 млрд долларга жакын акча салып салган. 1 млрд доллар акча менен мындай эки жолду салып койсок болот эле”,- деди Садыр Жапаров.
