Президент Кара-Сууда элге заманбап соода борборун куруп берүүнү убада кылды
Ош облусуна болгон жумушчу сапарынын алкагында Кыргызстандын президенти Садыр Жапаров жергиликтүү тургундар менен жолугушууларын улантты. Кара-Суу районунда талкуунун эң актуалдуу темасы — жергиликтүү базардын мындан аркы өнүгүүсү болду. Анткени анда айыл тургундарынын басымдуу бөлүгү эмгектенет.
Кара-Сууда заманбап соода борбору курулат деп билдирди Садыр Жапаров жергиликтүү тургундар менен жолугушууда.
Мамлекет башчысынын айтымында, буга чейин ал мамлекеттик "Туратали базары" ишканасынын ошол кездеги директору Нурбек Эргешовго соодагерлер үчүн заманбап шарттарды түзүү тапшырмасын берген. Башкача айтканда, контейнерлердин ордуна жайында салкын, кышында жылуу, ыңгайлуу имараттар курулушу керек.
Президент долбоордун жай ишке ашырылып жатканы үчүн жергиликтүү жетекчилерди сынга алды. Ошондой эле ал Бишкектеги тажрыйба тууралуу айтып өттү — азыр ал жакта Ош базары жаңы жерге көчүрүлүп жатат. Жаңы объектте соода орундардын саны 6 миң 700дөн 10 миң 800гө чейин көбөйтүлөт.
Мамлекет башчысы белгилегендей, жаңы базарда соодагерлер үчүн шарттар жакшыртылат: мурда соода орду 2 чарчы метрге чейин болсо, эми 10–15 чарчы метр каралган. Ал ошондой эле Кара-Сууда жаңы соода борбору курулганда бир да соодагер көңүл сыртында калбай турганын жана баарына орун берилерин убада кылды.
Анын айтымында, Ош базарынын курулушу аяктагандан кийин бийликтин көңүлү Кара-Сууда заманбап соода комплексин курууга бурулат. Бул жерде курулуш иштери 24 гектар аянтта жүргүзүлүүдө.
