Россия Кыргызстандагы балык тоютуна нөлдүк КНС киргизилгенине нааразы
Россиянын Экономикалык өнүгүү министрлиги 10-мартта Евразия экономикалык комиссиясына расмий кайрылуу жолдогону ЕАЭБ порталында жарыяланган.
Россия тараптын пикиринде, Кыргызстанда айыл чарба балыктары үчүн тоюттарга карата кошумча нарк салыгы (КНС) боюнча артыкчылыктуу шарт түзүлгөн. Тактап айтканда, жергиликтүү өндүрүштөгү тоюттар үчүн башка ЕАЭБ өлкөлөрүнөн келген продукцияга салыштырмалуу жеңилдик берилген деп эсептелүүдө.
Маалыматка ылайык, Кыргызстанда 2027-жылдын аягына чейин жергиликтүү балык тоюттарын жеткирүүгө 0% КНС коюлган. Ал эми ЕАЭБге мүчө башка өлкөлөрдөн, анын ичинде Россиядан импорттолгон тоюттарга 12% КНС колдонулат.
Россия тарап муну биримдиктин алкагындагы атаандаштык шарттарын бузушу мүмкүн деп эсептейт.
Сөз Министрлер Кабинетинин 2025-жылдын 22-декабрындагы №816 токтому тууралуу болууда. Бул документ азык-түлүк коопсуздугун камсыз кылуу жана бааларды турукташтыруу максатында кабыл алынган (2026-жылдын 12-февралындагы өзгөртүүлөр менен).
Азыркы учурда маселе ЕАЭБ алкагында каралып, тараптардын позициялары талкууланышы күтүлүп жатат.
Бул кайрылуу ЕАЭБге мүчө өлкөлөрдүн (Армения, Беларусь, Казакстан, Кыргызстан, Россия) бири ЕЭКке ички рынокто мүмкүн болгон тоскоолдуктарды аныктоо үчүн расмий кайрылган форматы болуп саналат.
Мындай учурда комиссия төмөнкү кадамдарды жасай алат:
- кайрылууда көрсөтүлгөн маселени талдайт
- эгер чындап эле тоскоолдук (барьер) бар деп тапса
- тиешелүү өлкөнүн өкмөтүнө аны жоюу боюнча сунуш (же кат) жөнөтөт
ЕЭК — бул ЕАЭБдин негизги жөнгө салуучу органы болуп эсептелет. Анын кызматкерлери мүчө өлкөлөрдүн жарандарынан дайындалып, көпчүлүгү мурда ошол өлкөлөрдүн өкмөттөрүндө иштеген адистер болот.
