Каракол шаарындагы эки көчө оңдолот
Каракол шаарынын мэри Талантбек Имановдун демилгеси жана көзөмөлү астында союз мезгилинен бери асфальт төшөлбөй келген Манас көчөсүнө капиталдык реконструкция жүргүзүлөт. Бул тууралуу шаардык мэриянын басма сөз кызматы билдирди.
Узундугу 1 чакырымды түзгөн көчө заманбап талаптарга ылайык, эки тилкелүү болуп курулуп, эки тарабына жөө жүргүнчүлөр үчүн тротуарлар салынат. Мындан тышкары сугат суу арыктары курулуп, көчө толугу менен түнкү жарыктандыруу менен камсыздалат.
Ошондой эле Бектенов көчөсүндө да ири курулуш иштери жүргүзүлөт. Узундугу 2 чакырым болгон бул көчө толугу менен жаңыланып, эки тилкелүү жол, тротуарлар, суу арыктары жана заманбап жарыктандыруу системасы менен жабдылат.
Каракол шаарынын мэри белгилегендей, шаар тургундары тарабынан көп жылдан бери көтөрүлүп келген бул маселелерди чечүү шаар бийлигинин негизги артыкчылыктуу багыттарынын бири болуп саналат.
Белгиленген долбоорлордун курулуш иштерин ушул жылдын ичинде толук аяктоо пландалууда. Долбоорлор ишке ашкандан кийин жүздөгөн шаар тургундары үчүн коопсуз, ыңгайлуу жана заманбап шарттар түзүлүп, унаа жана жөө жүргүнчүлөрдүн кыймылы кыйла жеңилдейт.
