Кыргызстанда мугалимдер үчүн KPI системасы киргизилет
Кыргызстандагы мектептерде 12 жылдык билим берүү системасына өтүүнүн алкагында мугалимдерге алардын иш жыйынтыгына жараша кошумча төлөмдөр караларын маалымат жыйынында билим берүү министри Догдуркүл Кендирбаева билдирди.
Анын айтымында, жакынкы үч жыл ичинде мугалимдер үчүн KPI (негизги көрсөткүчтөр) системасын киргизүү пландалып жатат. Ошондуктан мугалимдердин айлыгы массалык түрдө көбөйтүлбөйт, көбүнчө жекече (натыйжага жараша) жогорулатылат.
Догдуркүл Кендирбаева буга чейин STEM багытындагы мугалимдерге 20% кошумча төлөм каралганын эске салды. Себеби бул предметтер боюнча сааттар аз болуп, алардын айлыгы башка мугалимдерге салыштырмалуу төмөн болуп келген.
1-апрелден тартып эмгек акы төлөөнүн жаңы шарттары киргизилип, бардык педагогдор үчүн бирдиктүү коэффициент колдонулууда. KPI киргизилгенден кийин мугалимдер көбүрөөк киреше табууга мүмкүнчүлүк алышат.
Министр кайсы мугалимдер эң жогорку же эң төмөн айлык аларын тактаган жок. Анын айтымында, башкалардын кирешесин эсептөө туура эмес: ар кимдин жеке чыгымдары — өзү, үй-бүлөсү жана ата-энеси үчүн — ар башка болушу мүмкүн. Мугалимдер да жеке чектерин сактоону суранышкан.
Кыргызстанда 1-апрелден тартып мугалимдердин айлыгы 100%га жогорулатылган. Ошол эле учурда баарына бирдиктүү коэффициент киргизилип, мугалимдер ай сайын колуна канча акча ала турганы боюнча мисалдар да келтирилген.
