Евробиримдик Россиянын “гибриддик ишмердүүлүгүнө” байланыштуу чектөөлөрдү узартты
Евробиримдиктин Кеңеши Россиянын чет өлкөлөрдөгү туруксуздаштыруучу аракеттерине жооп катары киргизилген айрым чектөө чараларынын мөөнөтүн 2027-жылдын 9-октябрына чейин узартты.
Евробиримдиктин маалыматына ылайык, чаралар Россиянын “гибриддик ишмердүүлүгүнө”, анын ичинде чет өлкөлүк маалымат мейкиндигин манипуляциялоо жана кийлигишүүгө (FIMI) байланыштуу киргизилген.
Учурда бул санкциялык режимдин алкагында 80 жеке адамга жана 20 уюмга чектөө чаралары колдонулууда. Алардын активдери тоңдурулат, ошондой эле Евробиримдиктин жарандарына жана компанияларына бул адамдарга каражат, финансылык активдер же экономикалык ресурстарды берүүгө тыюу салынат. Жеке жактар үчүн Евробиримдиктин аймагына кирүүгө же анын аймагы аркылуу транзит менен өтүүгө да чектөө коюлган.
Бул чектөө чаралары 2024-жылдын 8-октябрында Россиянын Евробиримдиктин жана анын мүчө мамлекеттеринин коопсуздугуна, туруктуулугуна жана башка негизги баалуулуктарына коркунуч жараткан аракеттерине жооп катары киргизилген.
Евробиримдиктин Кеңеши 2026-жылдын июнь айында Россия жана Беларусь сыяктуу мамлекеттерге байланыштырылган гибриддик кампанияларга каршы чараларды күчөтүүгө чакырган.
