Жетим-Тоону иштетиш үчүн 9 млрд доллар талап кылынат
Нарын облусунун Ат-Башы районунун тургундары менен болгон жолугушууда президент Садыр Жапаров мамлекет Жетим-Тоо темир кенин өз күчү менен иштетүүгө ниеттенип жатканын билдирди.
Президент мамлекет Жетим-Тоону Кумтөр сыяктуу эле 100% өз алдынча иштетүүнү пландап жатканын белгиледи. Бирок бул долбоор абдан чоң каржылык салымдарды талап кылат.
“Ал жерде сөзсүз завод куруу керек. Биз жөн гана чийки затты сатып жибербешибиз керек. Бул үчүн болжол менен 9 миллиард доллар талап кылынат. Бирок долбоор ишке кирсе, 5–10 жылдын ичинде өзүн толук актайт. Азыр биз ошол каражаттарды табуунун үстүндө иштеп жатабыз. Эгер күчүбүз жетсе, өзүбүз эле ишке ашырабыз. Эгер жетпесе, инвесторлор менен үлүштүк негизде — 30/70 же 60/40 форматында б0иргелешип иштейбиз”, – деди Садыр Жапаров.
Президент буга чейин билдиргендей, учурда Жетим-Тоодогу темир кенинин запасы 5 миллиард тоннадан ашат. Акчалай эсептегенде бул кен байлыгынын наркы болжол менен 50 миллиард долларга бааланат.
