“Ала-Тоо Резорт” долбоору инвесторлорго тааныштырылды
13-июлда Бишкекте “Ала-Тоо Резорт” долбоору потенциалдуу инвесторлорго тааныштырылды. Бул тууралуу аталган ишканадан билдиришти.
Жолугушууга "Ала-Тоо Резорт" ААКсынын жетекчилиги, Курулуш, архитектура жана турак жай-коммуналдык чарба министрлигинин өкүлдөрү жана инвесторлор катышты.
Жолугушууда төрт мезгилде тең иштей турган курорттук шаарчанын курулушу жана алдыдагы пландар тууралуу маалымат берилди. Катышуучуларга суу, электр тармактарын тартуу, инженердик инфраструктураны даярдоо жана объектилерди долбоорлоо иштери тааныштырылды.
Андан соң инвесторлор өз сунуштарын ортого салышты. Татарстандык инвестор Ильназ Абдуллин курорттун архитектуралык көрүнүшү боюнча оюн бөлүштү. “Lumicon – Lighting Design Studio” компаниясынын жетекчиси Василий Тарасенко жарыктандыруунун башкы концепциясын сунуштады. Ал эми “Про Фокус Групп”компаниясынын өкүлү Нурай Бакасова чыгымдарды азайтуу жана сатып алууларды натыйжалуу уюштуруу боюнча баяндама жасады.
Жыйындын соңунда суроо-жооп болуп, тараптар сунуштарды жана мындан аркы кызматташуу мүмкүнчүлүктөрүн талкуулашты.
