Чүйдө 390 млн долларга 14 долбоор ишке ашырылат
Президентинин тапшырмасынын негизинде Чүй районундагы өнөр жай аймактарын өнүктүрүү маселелери боюнча көчмө кеңешме өттү. Иш-чаранын алкагында жалпы аянты 202 гектарды түзгөн өнөр жай аймагын түзүү долбоорунун ишке ашырылышынын жүрүшү менен таныштырылды. Бул тууралуу президенттин өзгөчө тапшырмалар боюнча атайын өкүлү Бакыт Төрөбаев билдирди.
Маалыматка ылайык, учурда жалпы аянты 202 гектарды түзгөн жер тилкеси белгиленген тартипте өнөр жай, транспорт, байланыш, энергетика жана башка атайын багыттагы жерлер категориясына өткөрүлгөн. Ошондой эле фармацевтика, курулуш материалдарын өндүрүү, машина куруу, прибор куруу, тамак-аш өнөр жайы жана айыл чарба продукциясын кайра иштетүү тармактарында долбоорлорду ишке ашырууну пландаган 14 потенциалдуу резидент аныкталган. Жарыяланган инвестициялардын жалпы көлөмү 390 млн доллардан ашат. Долбоорлорду ишке ашыруу жаңы жумуш орундарын түзүүгө, өнөр жай өндүрүшүнүн көлөмүн көбөйтүүгө жана өлкөнүн экспорттук потенциалын кеңейтүүгө мүмкүндүк берет.
Кеңешменин катышуучулары өнөр жай аймагынын инженердик инфраструктурасын түзүү маселелерине өзгөчө көңүл бурушту. Тактап айтканда, аймакты электр энергиясы менен камсыз кылуунун варианттары, ошондой эле суу менен камсыздоо жана саркынды сууларды чыгаруу маселелери каралды.
Инвесторлор үчүн жагымдуу шарттарды түзүү жана өнөр жай аймагынзарыл болгон инженердик инфраструктура менен өз убагында камсыз кылуу мамлекеттик органдардын эң башкы милдеттеринин бири экендиги белгиленди.
Кеңешменин жыйынтыгында тармактык мамлекеттик органдарга өнөр жай аймагын инженердик инфраструктура менен камсыздоонун оптималдуу механизмин аныктоо боюнча тиешелүү тапшырмалар берилип, жооптуу аткаруучулар жана биринчи кезектеги иш-чараларды ишке ашыруу мөөнөттөрү белгиленди.
