Манас шаарында 250 млн сомдук металл ишканасы курулуп жатат
Манас шаарынын мэри Уларбек Исмаилов тиешелүү мекеме-ишканалардын жетекчилери менен биргеликте аймакта курулуп жаткан ири өндүрүш объектилерин кыдырды. Бул тууралуу калаа мэриясынын басма сөз кызматы билдирди.
Маалыматка ылайык, текшерүү учурунда металл буюмдарын чыгаруучу заманбап заводдун курулушу көзөмөлдөндү. Учурда иштердин 80%ы аяктаган. Долбоордун жалпы баасы 250 млн сомду түзөт.
Мындан сырткары, "Тойбосс" компаниясы куруп жаткан азык-түлүк өндүрүүчү заводдун курулуш аянтчасына барды. Долбоордун жалпы наркы 2 млн долларды түзүп, заводду ушул жылдын аягына чейин ишке киргизүү каралган. Учурда объектте курулуш иштери жүрүп жатат.
Иш сапардын жүрүшүндө мэр курулуш иштеринин сапатына көңүл буруп, объектилерди белгиленген мөөнөттө бүткөрүү жана талаптарды так сактоо боюнча тапшырмаларды берди.
