Wildberries'теги кырдаалга байланыштуу ишкерлерди колдоо чаралары аныкталды
Экономика жана коммерция министрлиги Wildberries соода аянтчасына байланыштуу түзүлгөн кырдаалдан улам ишкерлерди колдоонун кошумча чараларын карап жатат. Бул тууралуу министрликтин басма сөз кызматы билдирди.
27-июлда экономика жана коммерция министринин орун басары Беназир Нурланованын төрагалыгы алдында ишкерлерди жеңилдетилген шарттарда насыялоо долбооруна катышкан финансы-кредиттик уюмдардын өкүлдөрү менен кеңешме өттү.
Жолугушууда Wildberries'тин айланасында түзүлгөн кырдаалдын ата мекендик өндүрүүчүлөргө, анын ичинде тигүү тармагындагы ишканаларга тийгизген таасири талкууланды. Ошондой эле ишкерлердин каржылык жүгүн азайтуу боюнча мүмкүн болгон чаралар каралды.
Кеңешменин жыйынтыгында кыйынчылыктарга туш болгон тигүү тармагындагы ишкерлер үчүн негизги карызды төлөөнү жеңилдетүү мөөнөтүн узартуу боюнча чаралар аныкталды.
Маалыматка ылайык, сунушталып жаткан чаралар ишкерлердин насыялык жүгүн азайтууга, ишканалардын туруктуу иштөөсүн камсыздоого, өндүрүштөрдү жана жумуш орундарын сактап калууга багытталган.
