Кыргызстан менен ЕАӨБ биргелешкен долбоорлорду каржылоону кеңейтет
Кыргызстандын Мамлекеттик өнүктүрүү банкы менен Евразия өнүктүрүү банкы инвестициялык долбоорлорду ишке ашырууда кызматташууну күчөтөт. Тараптар бул боюнча өз ара түшүнүшүү меморандумуна кол коюшту.
Документтин алкагында экономиканы, инфраструктураны өнүктүрүү, ишкерликти колдоо жана инвестиция тартуу багытындагы долбоорлорду биргелешип даярдоо жана ишке ашыруу каралган.
Меморандумга Мамлекеттик өнүктүрүү банкынын башкармалыгынын төрагасы Эмил Такырбашев жана ЕАӨБ башкармалыгынын төрагасынын орун басары Алексей Скатин кол койду.
Скатиндин айтымында, кызматташтык Кыргызстандын артыкчылыктуу тармактарына узак мөөнөттүү каржылоону тартуу мүмкүнчүлүгүн кеңейтет.
Ал биргелешкен долбоорлор туруктуу экономикалык өсүшкө, инвестиция тартууга жана калктын жашоо сапатын жакшыртууга багытталарын белгиледи.
