МинКаб төрагасы: маданият тармагына жылына 6-10 млрд сом бөлүнүп жатат
Кыргызстанда маданият тармагына жыл сайын 6-10 млрд сомдун тегерегинде каражат бөлүп жатат. Бул тууралуу бүгүн министрлер кабинетинин төрагасы Адылбек Касымалиев маданият кызматкерлерин кесиптик майрамы менен куттуктап жатып айтты.
Анын айтымында, бул каражат маданиятты өнүктүрүүгө, маданий мекемелердин ишмердүүлүгүн илгерилетүүгө, искусство чыгармаларын жаратууга жана жайылтууга, керектүү шартарды түзүүгө сарпталууда.
Ошондой эле МинКаб башчысы быйыл Кыргызстанда өткөн VI Дүйнөлүк көчмөндөр оюндары кыргыз маданиятын дүйнөгө таанытып, өлкөнүн эл аралык аброюн чыңдоодо олуттуу кадам болгонун белгиледи.
"Дүйнөнүн 100дөн ашык өлкөсүндөгү калктын көңүл борборунда болгон бул оюндар, этнографиялык жана маданий конкурстар дүйнө жүзүнө кыргыз маданиятын, жалпы эле көчмөндөр цивилизациясын даана көрсөттү", - деди өкмөт башчысы.
