Аксы жана Токтогул РЭТтерине жаңы имарат курууга 16 млн сом каралды
Энергетика министрлигинин аймактардагы эскирген энергообъектилердин административдик имараттарын жаңылоо боюнча тапшырмасына ылайык, Аксы РЭТинин Кербен бөлүмүнүн жана Токтогул РЭТинин Үч-Терек бөлүмүнүн административдик имараттары жаңыланып, жаңы имараттар курулат.
Министрликтин маалыматына ылайык, курулуш иштери 2026-жылдын март айында башталып, ноябрь айында аяктайт. Долбоорду каржылоого "КУЭТ" ААК тарабынан 16 млн сом бөлүнгөн.
Демилге Жалал-Абад электр тармактар ишканасы тарабынан көтөрүлүп, 2026-жылдын пландуу иш-чаралар тизмесине киргизилген. Учурда тендер жарыяланып, долбоорлоо жана уюштуруу иштери жүрүүдө.
Жаңы имараттар кызматкерлер үчүн заманбап шарттарды түзүп, керектөөчүлөрдү тейлөөнүн сапатын жогорулатууга жана энергетика тармагындагы техникалык базаны чыңдоого багытталган.
Мындан тышкары, Чаткал райондук электр тармактар ишканасынын эки кабаттуу жаңы административдик имаратынын курулушу өткөн жылы башталган. Объект үстүбүздөгү жылдын июнь айына чейин бүткөрүлүп, пайдаланууга берилет. Эске салсак, Чаткал РЭТинин мурдагы имараты дарыя жээгинде жайгашып, авариялык абалда болгон.
