"Ала-Арча" жаратылыш паркында электр жарыгы менен камсыздоо жакшырууда
"Ала-Арча" мамлекеттик жаратылыш паркында электр жарыгы менен камсыздоонун ишенимдүүлүгүн жогорулатуу үчүн аракеттер көрүлүүдө. Бул тууралуу "Кыргызстан улуттук электр тармагы" ачык акционердик коомунан билдиришти.
Буга чейин "Кыргызстандын улуттук электр тармагы" ААКнын Бишкек электр тармактары ишканасынын адистери "Байтик" көмөк чордонунан чыгуучу 10 кВ аба электр берүү чубалгысын калыбына келтиришкен.
Белгиленгендей, аткарылган иштердин алкагында электр берүү чубалгысындагы эски зымдар СИП-3 зымдарына алмаштырылып, 115 жаңы мамы орнотулду.
Учурда адистер 10 кВ чыңалуудагы реклоузерлерди программалап жатышат. Бул заманбап жабдуулар электр тармагынын айрым тилкелерин аралыктан башкарууга жана зарыл учурда ыкчам өчүрүп-күйгүзүүгө мүмкүнчүлүк берет.
Министрликтин маалыматына ылайык, жаңылоо иштери авариялык кырдаалдарга ыкчам чара көрүүгө жана паркты үзгүлтүксүз электр жарыгы менен камсыздоого багытталган.
