Бишкек жана Оштун электр тармактарына заманбап эсептегичтер берилди
Ош жана Бишкекке электр жарыгын автоматташтырылган коммерциялык эсепке алуу системасы үчүн жаңы жабдуулар алынды. Бул тууралуу Энергетика министрлигинин басма сөз кызматы билдирди.
Маалыматка ылайык, Ош шаарына 35 976 даана бир фазалуу жана 6 800 даана үч фазалуу эсептегич, ошондой эле маалыматтарды чогултуу жана берүүчү 820 даана түзмөк жеткирилген.
Борбор калаага болсо 77 924 даана бир фазалуу эсептегич жана 1 180 даана түзмөк келген.
Буга чейин "Кыргызстандын улуттук электр тармагы" ААКтын кампасына 122 700 даана электр энергиясын эсепке алуу жабдуусу кабыл алынган.
Автоматташтырылган коммерциялык эсепке алуу системасын киргизүү демилгесин Энергетика министрлиги Дүйнөлүк банктын каржылык колдоосу менен ишке ашырууда. Долбоордун алкагында Кыргызстанга жалпысынан 390 миң даана эсептегич жеткирүү көздөлүүдө.
Жеткирилген жабдуулар "Кыргызстандын улуттук электр тармагы" ААК аркылуу аймактык электр тармактары ишканаларына бөлүштүрүлүп, андан соң керектөөчүлөргө орнотулат.
