Кыргызстан Евробиримдиктен 17 млн евро грант алат
Финансы министрлигинин маалыматына ылайык, Европа Биримдиги Кыргызстанда суу секторун реформалоо долбоорду ишке ашыруу үчүн 17 миллион евро грант бөлөт.
Маалыматка ылайык, 10-октябрда Бельгиянын Брюссель шаарында өткөн Global Gateway форумунун алкагында Кыргызстандын финансы министринин орун басары Улан Календеров менен Европа комиссиясынын эл аралык өнөктөштүк боюнча өкүлү Петерис Устубс жолугушту.
Жолугушууда Кыргызстан менен Европа Биримдигинин ортосундагы кызматташууну чыңдоо маселелери талкууланды. Натыйжада, Министрлер Кабинети менен Европа комиссиясынын ортосунда 17 млн евро өлчөмүндөгү гранттык келишимге кол коюлду.
Аталган каражат суу секторун реформалоого, анын ичинде инфраструктураны жакшыртууга, башкаруунун натыйжалуулугун жогорулатууга жана ресурстарды туруктуу пайдаланууну камсыз кылууга багытталат.
Жолугушуунун жыйынтыгында тараптар мындан ары да эки тараптуу кызматташтыкты кеңейтүү ниетин билдиришти.
