Чакан жана орто ишкерликти колдоо максатында 143,98 млн сом насыя берилди
Чакан жана орто ишкердик субъекттерин колдоо, региондордун өнүгүшүнө, жашыл экономиканын өнүгүүсүнө жана экономикалык өсүшкө дем берүү максатында, Министрлер Кабинети “Кыргыз Республикасынын чакан жана орто ишкердик субъекттерин жеңилдетилген кредиттөө” долбоору бекиткен. Бул тууралуу Финансы министрлигинен билдиришти.
Долбоордун негизги максаты — ишкерлерге жана жарандарга жеткиликтүү, төмөн пайыздагы жана жеңилдетилген шарттагы кредиттерди берүү аркылуу өндүрүштү, кызмат көрсөтүүнү жана жаңы жумуш орундарын өнүктүрүүгө шарт түзүү.
Бул долбоорду ишке ашырууга “Ишкердикти өнүктүрүү фонду” микрокредиттик компаниясы катышууда. 2025-жылга карата жалпы кредиттик портфелдин көлөмү 500 миллион сомду түзөт.
9-октябрга карата долбоордун алкагында 49 ишкерлик субъектине жалпы 143,98 миллион сом суммадагы жеңилдетилген кредиттер берилди.
Бул демилге өлкөдө чакан жана орто бизнести өнүктүрүү, жаңы жумуш орундарын түзүү жана калктын жашоо деңгээлин жогорулатуу багытындагы маанилүү кадам болуп саналат.
