Мамлекетке карызы бар жарандар үчүн аэропорттон эле терминал аркылуу төлөп карызынан кутулууга мүмкүнчүлүк түзүлөт. Бул тууралуу Сот департаментинин директору Медербек Сатыев парламентте айтып берди.

Анын айтымында, учурда автоматташтырылган программа түзүлүп бүттү. Жарандар аэропорттон эле терминал аркылуу төлөй ала тургандай болот. Маселе 10-20 мүнөттүн аралыгында чечилет.

«Учурда жарандардын чет өлкөгө чыгышына чектөө сот аткаруучунун токтому менен коюлат, тыюуну алуу үчүн да сот аткаруучунун токтому керек. Ошол азыр автоматтык түрдө чечиле турган болуп жатат. Программаны иштеп чыктык, баары даяр», — деди Сатыев.

Сатыев бул долбоорду 10 күндүн ичинде Жогорку Кеңешке алып келүүнү убадалады.