Жалал-Абад облусунун Сузак районунун Орто-Сай айылында 96 үй-бүлөгө ылайыкташтырылган социалдык шаарчанын курулушу башталды. Бул тууралуу президенттин Жалал-Абад облусундагы өкүлчүлүгү кабарлады.

Маалыматка ылайык, долбоор «Ас-Сафа борбору» коомдук бирикмеси ишке ашырат. Ага жергиликтүү бийлик 3 гектар жер аянтын ажыратып берген. Шаарчада тигүү цехи, фельшерлик-акушердик пункту (ФАП), азык-түлүк дүкөнү, мечит жана кичи футбол аянтчасы курулат.

Социалдык шаарчада турак жайлар биринчи кезекте көп балалуу жалгыз бой энелерге, ден соолугунан мүмкүнчүлүгү чектелген, жашоо шарты оор деп аныкталган үй-бүлөлөргө бөлүштүрүлөт. Курулуш иштерин ушул жылдын күз айларына аяктоо пландаштырылган.