Кыргызстандыктарды Япониянын IT-компанияларында ишке орноштуруу маселеси талкууланды
Билим берүү жана илим министринин орун басары Аида Рысбаева Япониянын Digital Knowledge IT компаниясынын директору Ясуюки Ногучи жана Friendly Tech Co. Ltd компаниясынын директору Ито Хирото менен жолугушту. Бул тууралуу Билим берүү жана илим министрлиги кабарлады.
Жолугушууда 2023-жылдын март айында Японияда кол коюлган И. Арабаев атындагы Кыргыз мамлекеттик университети менен жогоруда аталган компаниялардын ортосундагы кызматташуу тууралуу келишимди ишке ашыруу маселеси талкууланды. Атап айтканда, IT адистерди даярдоо, бүтүрүүчүлөрдү Япониянын компанияларында ишке орноштуруу жана Кыргызстандын жогорку окуу жайларында япон тилин окутуу.
Ошондой эле министрдин орун басары жогорудагы келишимдин алкагында өнөктөштүктүн өнүгүшүнө ишеним артарын билдирди.
Өз кезегинде жапон тарап КРнын Билим берүү жана илим министрлигинин колдоосу менен ар тараптуу кызматташууга жана түзүлгөн мамилелерди тереңдетүүгө даярдыгын билдирди.
