ӨКМ: 9 айдагы кырсыктар 1,5 млрд сом чыгым алып келди
Кечээ, Өзгөчө кырдаалдар министрлигинде 2025-жылдын 9 айындагы иштердин жыйынтыгы жана алдыдагы милдеттер боюнча коллегия өттү. Бул тууралуу министрликтен билдиришти.
Коллегияда 9 ай ичинде аткарылган иштер тууралуу министрдин биринчи орун басары Акылбек Мазарипов маалымат берип, негизги багыттарга токтолду. Анын айтымында, бул аралыкта өлкөдө 10 өзгөчө кырдаал катталып, 16 адам каза болгон. Материалдык чыгым 45,5 млн сомду түздү. Былтыркыга салыштырмалуу өзгөчө кырдаалдардын саны 92%га, ал эми чыгымдар 96%га азайганы белгиленди.
Жалпысынан өлкөдө 3286 кырсык катталып, 243 адам каза болгон. Бирок куткаруучулардын ыкчам аракети менен 342 адамдын өмүрү сакталып калган. Бул көрсөткүч өткөн жылга салыштырмалуу 46%га жогорулаган.
Мониторинг жана божомол иштеринин натыйжасында республиканын аймагында 12 миңге жакын табигый кооптуу процесстер катталган. Алар боюнча 1500дөн ашык изилдөө жүргүзүлүп, анын жарымынан көбү сел жана суу каптоо коркунучтарына байланыштуу болгон.
Министрлик тарабынан сел жана суу ташкындарынын алдын алуу иштерине да басым жасалган. 9 ай ичинде 241 объект пландалып, анын ичинен 216сында жумуштар аяктаган. Натыйжада 11 миңден ашуун үй-бүлө жана 1700 гектар айыл чарба жери корголгон. Бул иштин экономикалык натыйжалуулугу 68 эсеге өскөнү айтылды.
Жыйын соңунда министрдин биринчи орун басары министрликтин тиешелүү кызматтарына кышка карата даярдыкты күчөтүүнү тапшырды.
