Чүй облусунда мыйзамсыз аңчылык кылгандар кармалды
Жаратылыш ресурстары, экология жана техникалык көзөмөл министрлигинин өкүлдөрү Чүй облусунун аймагында рейд иштерин өткөрүп, анын жүрүшүндө мыйзамсыз аңчылык менен алектенген бир нече жаран кармалды.
Аталган министрликтин маалыматына ылайык, аңчылык менен алектенгендерге карата КРнын Жоруктар жөнүндө кодексинин 263-беренеси (аң уулоо эрежелерин бузуу) боюнча 9 протокол түзүлүп, ар бирине 12 500 сом өлчөмүндө айып пул салынды. Жалпы айып пулдун суммасы 112 500 сомду түздү, мындан тышкары 11 000 сомдук доо коюлду.
Экологиялык жана техникалык көзөмөл кызматы мыйзамсыз аңчылыкка каршы күрөштү улантып, өлкөнүн аймактарында экологиялык тең салмактуулукту сактоо багытындагы иштерди уланта бермекчи.
