Кызыл-Кыяда коопсуздукту сактабаган курулушка 200 миң сом айып салынды
Баткен облусуна караштуу Кызыл-Кыя шаарында коопсуздук техникасы боюнча талаптарды сактабаган объект аныкталып, айып пул салынды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, Мамлекеттик архитектура-курулуш контролдоо департаментинин Баткен регионалдык башкармалыгы тарабынан көп кабаттуу турак үйлөрдүн курулуш иштерине техникалык көзөмөл жүргүзүлүүдө.
Иш-чаранын алкагында Баткен облусуна караштуу Кызыл-Кыя шаарынын Кулатов көчөсүндө жайгашкан “Элит Грант” ЖЧКсы тарабынан курулуп жаткан объект текшерилди. Текшерүү учурунда объектинин коопсуздук техникасы боюнча талаптар сакталбагандыгы аныкталды.
Натыйжада, “Элит Грант” ЖЧКсына КРнын “Укук бузуулар жөнүндө” кодексинин негизинде акт түзүлүп, 200 000 (эки жүз миң) сом өлчөмүндө айып пул салынды.
