Кыргызстанда 3,2 млн долларлык ковролин чыгаруучу ишкана курулат
Азербайжан–Кыргыз өнүгүү фонду менен «Орион Гранд» ЖЧКсынын ортосундагы инвестициялык келишимге кол коюлду. Бул тууралуу Экономика жана коммерция министрлигинен билдиришти.
Келишимге ылайык, өлкөдө ковролин өндүрүүчү заманбап ишкана курулат. Бул долбоор Кыргызстанда ковролин өндүрүү боюнча биринчи болуп саналат, анткени буга чейин ковролин толугу менен чет өлкөдөн алынып келген.
Долбоордун жалпы суммасы 3,2 млн долларды түзөт, анын 1 млн доллары Азербайжан–Кыргыз өнүгүү фонду тарабынан каржыланат. Өндүрүш жергиликтүү рынокко жана экспортко багытталат, бул жумуш орундарын түзүүгө жана өлкөнүн өнөр жай потенциалын күчөтүүгө өбөлгө болот.
